У рэестар ЮНЭСКА «Памяць сьвету» ўнесеныя 38 новых помнікаў дакумэнтальнае спадчыны чалавецтва. Гэта рукапісы і расьпісныя мініятуры, архіўныя дакумэнты і першыя кінафільмы. Сярод іх – прадстаўлены Чэхіяй збор пэрыядычных выданьняў эмігрантаў з Расеі, Украіны і Беларусі пэрыяду з 1918 да 1945 году, а таксама калектыўны помнік Польшчы, Расеі і Славэніі – Супрасьльскі кодэкс.
Супрасьльскі кодэкс належыць да IX стагоддзя і ўяўляе сабой ёмісты збор рукапісаў на стараславянскай мове. Заява аб уключэньні Супрасьльскага кодэксу ў рэестар ЮНЭСКА была пададзеная супольна Польшчай, Расеяй і Славэніяй. У гэтых краінах захоўваюцца фрагмэнты дадзенага манускрыпту. У сьпіс дакумэнтальнае спадчыны ўключаны таксама архіў Камітэту народнай адукацыі Рэчы Паспалітай 1773–1787 гадоў, што дакумэнтуе першую ў Эўропе буйнамаштабную рэформу адукацыі.
Сьпіс з 38 новых помнікаў быў зацьверджаны Генэральным дырэктарам ЮНЭСКА на падставе прапановаў Міжнароднага кансультацыйнага камітэту праграмы «Памяць сьвету», чые паседжаньні прайшлі з 11 да 15 чэрвеня ў сталіцы ПАР Прэторыі.
Рэестар «Памяць сьвету» створаны ў 1997 годзе і сёньня налічвае 158 помнікаў. Сярод іх – арыгінальныя грамафонныя плыткі з запісам музыкі ўругвайскага кампазытара Карласа Гардэля; залатыя сьпісы імпэратарскіх іспытаў часоў дынастыі Цын і лісты намібійскага правадыра Хэндрыка Вітбуя. У гэтым сьпісе ёсьць мапы Расейскай імпэрыі, Эвангельле Хітрава канца XIV стагоддзя, а таксама рукапісы і ліставаньне Ганса Хрыстыяна Андэрсэна, фільмы братоў Люм'ер, праца Мікалая Капэрніка.
Праграма ЮНЭСКА «Памяць сьвету» створаная дзеля захаваньня ў розных краінах сьвету дакумэнтальнае спадчыны і мэмуараў, што адлюстроўваюць разнастайнасьць моваў, народаў і культураў, а таксама дзеля прыцягненьня ўвагі грамадзкасьці да іх важнасьці. Стварэньне Праграмы зьяўляецца вынікам усьведамленьня грамадзкасьцю ўразьлівасьці і крохкасьці важных помнікаў дакумэнтальнае спадчыны.
|
